Spurning mánaðarins
Júlí 2026
Með spurningu mánaðarins er leitast við að svara spurningum sem komið hafa ítrekað inn á borð sviðs starfsumhverfis mannvirkjagerðar hjá Húsnæðis-, mannvirkja- og skipulagsstofnun. Fjöldi fyrirspurna varðandi mannvirkjagerð berst til Húsnæðis-, mannvirkja- og skipulagsstofnunar á ársgrunni í gegnum síma eða netfangið byggingarreglugerd@hms.is. Oft er um tiltekin stef að ræða. Eitt þeirra varðar hvar við erum stödd í endurskoðun á byggingarreglugerð.
Eldri spurningar mánaðarins eru að finna neðst undir Spurt og svarað
Hver er staðan á nýrri byggingarreglugerð?
HMS vinnur nú að heildarendurskoðun byggingarreglugerðar. Markmið verkefnisins er að einfalda reglugerðina, gera hana skýrari og aðgengilegri og stuðla að auknu svigrúmi til nýsköpunar án þess að dregið sé úr öryggi eða gæðum mannvirkja.
Endurskoðunin fer fram í áföngum og lögð er áhersla á opið samráð við hagaðila á öllum stigum verkefnisins.
Hverju er verið að breyta?
Í endurskoðuninni er meðal annars lögð áhersla á að:
⦁ Einfalda og stytta byggingarreglugerðina.
⦁ Færa reglugerðina í auknum mæli yfir í markmiðs- og virknimiðaða framsetningu.
⦁ Aðgreina betur bindandi kröfur og leiðbeinandi útfærslur.
⦁ Draga úr óþarfa tvítekningum.
⦁ Draga úr beinum tilvísunum í staðla þar sem það á við.
⦁ Skapa aukið svigrúm fyrir nýsköpun og faglegt mat.
⦁ Þróa leiðbeiningar samhliða reglugerðinni.
Samráð við hagaðila
Endurskoðun byggingarreglugerðarinnar byggir á virku samráði við hagaðila.
Víðtækt samráð fór fram haustið 2023, þar sem ellefu vinnuhópar störfuðu undir stjórn stýrihóps skipuðum af innviðaráðherra. Þeir komu að hugmyndavinnu um einstaka kafla reglugerðarinnar og hafa niðurstöður þeirrar vinnu verið nýttar við áframhaldandi endurskoðun reglugerðarinnar.
Nú eru næstu skref þau að leggja einstaka efniskafla reglugerðarinnar í opið samráð og gefa sérfræðingum og öðrum hagaðilum kost á að rýna drögin og koma á framfæri athugasemdum áður en reglugerðin verður birt í heild sinni.
Hvers vegna er reglugerðin birt í áföngum?
Byggingarreglugerðin er ein umfangsmesta reglugerð landsins og telur nú um 400 greinar í 17 köflum. Í stað þess að leggja alla endurskoðuðu reglugerðina fram í einu er hver efnishluti birtur sérstaklega þegar hann er tilbúinn.
Með því geta sérfræðingar og aðrir hagaðilar einbeitt sér að þeim efnisþáttum sem þeir þekkja best og komið á framfæri markvissum athugasemdum áður en reglugerðin verður birt í heild sinni í samráðsgátt stjórnvalda.
Hvar er verkefnið statt?
Fyrsti efniskaflinn, Hluti 3 – Innivist, hefur þegar verið birtur til samráðs og kynntur á opnum fundi. Nú er unnið að Hluta 5 – Varnir gegn eldsvoða og Hluta 6 – Burðarþol og stöðugleiki, sem áætlað er að birta í samráð í ágúst.
Aðrir efnishlutar reglugerðarinnar verða síðan birtir samkvæmt birtingar- og samráðsáætluninni hér að neðan.
Að loknu samráði um alla hluta verður reglugerðin birt í heild sinni í samráðsgátt stjórnvalda, samkvæmt áætlun í janúar 2027.
Kynningarfundir um byggingarreglugerð
Sem liður í opnu samráði hefur HMS haldið opna kynningarfundi um einstaka þætti verkefnisins. Þar eru kynnt drög að reglugerðarhlutum, markmið breytinga og gefinn kostur á umræðum og fyrirspurnum.
Hér má nálgast þær kynningar sem farið hafa fram.
Opnunarfundur
Á opnunarfundi verkefnisins var farið yfir:
⦁ Stafræn byggingarleyfi
⦁ Breytingar á byggingareftirliti
⦁ Markmið og fyrirkomulag endurskoðunar byggingarreglugerðar
Úr fundinum:
Kynning á Hluta 3 – Innivist
Á fundinum voru kynnt drög að 3. hluta reglugerðarinnar og helstu breytingar sem eru lagðar til. Fagaðilar komu með góðar ábendingar og skemmtilegar umræður.
Úr fundinum:
Hvernig er hægt að taka þátt?
Hægt er að taka þátt í endurskoðun byggingarreglugerðar með því að:
⦁ Fylgjast með kynningum HMS
Skráning á póstlista hér.
⦁ Kynna sér drög að einstökum hlutum.
Drög að reglugerð og greinargerð með breytingum að hverjum hluta verður birt á byggingarreglugerd.is.
⦁ Senda inn athugasemdir á samráðstíma.
Hægt er að senda ábendingar eða athugasemdir á netfangið byggingarreglugerd@hms.is
⦁ Taka þátt í opnu samtali um þróun byggingarreglugerðar.