Leiðbeiningar

1 Almennt

Við stjórn byggingarframkvæmda hvers leyfisskylds mannvirkis skal á hverjum tíma vera einn byggingarstjóri, samanber 27. gr. laga um mannvirki. Byggingarstjóri er einstaklingur sem fengið hefur starfsleyfi Húsnæðis-, mannvirkja- og skipulagsstofnunar (HMS). Heimilt er að fela lögaðila (fyrirtæki eða stofnun) að bera ábyrgð sem byggingarstjóri. Það er háð því skilyrði að hjá lögaðilanum starfi einstaklingur sem er með starfsleyfi og vinni þau störf við mannvirkjagerðina sem byggingarstjóra er ætlað.

2 Heimild til að fela lögaðila að bera ábyrgð sem byggingarstjóri

Ákvæði 4.7.6. gr. byggingarreglugerðar, samanber 5.mgr. 28. gr. laga um mannvirki, um að fyrirtæki geti í eigin nafni borið ábyrgð sem byggingarstjóri er bundið því skilyrði að innan fyrirtækisins, eða stofnunarinnar, starfi einstaklingur við byggingarstjórn sem hefur starfsleyfi til að annast umsjón með þeirri gerð mannvirkis. Um heimild er að ræða. Sé hún ekki nýtt er ábyrgð byggingarstjórnar í höndum einstaklings sem sinnir starfinu í eigin nafni.

Störf byggingarstjóra við mannvirkjagerð verða að vera unnin af einstaklingi sem hefur starfsleyfi sem byggingarstjóri. Heimild til að færa ábyrgð yfir á fyrirtækið breytir engu þar
um. Um starfsleyfi byggingarstjóra er fjallað í 28. gr. laga um mannvirki og veiting starfsleyfis er bundin við persónur sem sækjast eftir slíku leyfi og fullnægja skilyrðum til að starfa sem slíkir. Með heimild fyrirtækja og stofnana til að bera ábyrgð er veittur möguleiki til að takmarka þá persónulegu ábyrgð sem einstaklingur, sem starfar hjá fyrirtæki eða stofnun, ber á verkinu.

Það er því ekki fyrirtæki eða stofnun sem er byggingarstjóri þó svo að það beri ábyrgð á störfum byggingarstjóra.

Við skráningu byggingarstjóra við mannvirkjagerð þarf að koma skýrt fram hvaða einstaklingur er skráður byggingarstjóri við þær framkvæmdir sem um ræðir.

Það gilda því allar sömu reglur um byggingarstjóra sem starfar á ábyrgð fyrirtækis og byggingarstjóra sem gerir það ekki. Þar með talið að byggingarstjórum sé ekki heimilt að taka að sér ábyrgð á hönnun eða einstökum verkþáttum mannvirkjagerðar sem hann stýrir nema um sé að ræða smærri byggingu til eigin nota eins og nánar er skilgreint í  4.7.2. gr. byggingarreglugerðar nr. 112/2012.

Þannig eru starfsheimildir byggingarstjóra líka takmarkaðar við gerð mannvirkja, umfang framkvæmda og starfsreynslu þess einstaklings sem sinnir byggingarstjórn sbr. 4.7.4. gr. byggingarreglugerðar nr. 112/2012

Tilvísanir

• Byggingarreglugerð nr. 112/2012 með síðari breytingum
• Lög um mannvirki nr. 160/2010 með síðari breytingum
• Frumvarp til laga um mannvirki. Lagt fyrir Alþingi á 139. löggjafarþingi 2010-2011. Þingskjal 82, 78. mál.

Yfirlit yfir breytingar sem gerðar hafa verið á leiðbeiningunni: