Leiðbeiningar

1 Sjá kafla 14.9 Loftræstibúnaður.

2 5. mgr. 6.11.5 gr.:

• Tryggja skal góðan hindrunarlausan aðgang að inngöngum bygginga frá bílastæðum hreyfihamlaðra í bílageymslum. Þess skal gætt að næg bílastæði fyrir hreyfihamlaða séu við byggingar, sjá töflur 6.01. - 6.04. í 6.2.4. gr. byggingarreglugerðar, Bílastæði hreyfihamlaðra.
• Bílastæði fyrir hreyfihamlaða ættu að vera sem næst inngangi að byggingum úr bílgeymslum.
• Mælt er með að bílastæði hreyfihamlaðra séu upphækkuð í gönguleiðarhæð ef þær eru í öðrum kóta en gólf bílgeymslunnar.
• Við útfærslu á bílastæðum fyrir hreyfihamlaða skal taka tillit til rýmisþarfa hjólastólanotenda.
• Fimmta hvert stæði fyrir hreyfihamlaða skal vera 4,5 m x 5,0 m að stærð með þriggja metra löngu athafnasvæði fyrir enda þess eða alls 4,5 m x 8,0 m að stærð (fyrir ferðaþjónustubíla og aðra bíla fyrir hreyfihamlaða með lyftu að aftan). Þó skal aldrei vera færri en eitt slíkt stæði við hverja byggingu (ofast höfð utandyra).
• Bílastæði fyrir hreyfihamlaða skal vera 3,8 m að breidd og 5,0 m að lengd eða 2,8 m x 5,0 m með hindrunarlausu 1,0 m breiðu umferðarsvæði samsíða.
• Bílastæði hreyfihamlaðra sem eru samsíða akbraut skulu vera 2,5 m x 8,0 m að stærð og þess gætt að hindrunarlaust svæði sé samsíða stæðunum gönguleiðarmegin 2,0 m x 8,0 m að stærð.

• Krafan um 3,8 metra breidd bílastæða gerir það mögulegt að hjólastólanotandi geti flutt sig yfir í hjólastólinn eða notað hækjur/ stafi við hlið bílsins.
• Bílastæði fyrir hreyfihamlaða þarf 2,6 m fría lofthæð, svo stærri bílar og ferðaþjónustubílar geti notað þau. Þetta á einnig við um til dæmis undir skyggnum, útskagandi skiltum, útskagandi byggingarhlutum og þess háttar.
• Hámarks halli á bílastæðum hreyfihamlaðra er 1:40 (2,5 %). Meiri halli gerir hreyfihömluðum og hjálpatækjanotendum afar erfitt fyrir að athafna sig.
• Nauðsynlegt er að að minnsta kosti 1,0 metra breið gönguleið sé á milli bílastæða með nokkurra stæða millibili svo tryggt sé að hjólastólanotendur og gangandi komist frá bílastæðum að gangstétt. Þessa gönguleið (1,0 m) er nauðsynlegt að merkja á yfirborði til dæmis með því að mála hana með röndum á ská (45°).

• Nauðsynlegt er að merkja stæði fyrir hreyfihamlaða bæði í yfirborðsefni og með lóðréttum skiltum. Merking bílastæða fyrir hreyfihamlaða í yfirborðsefni skal vera hvítmálað merki hreyfihamlaðra á dökkbláum grunni. Forðast skal að heilmála bílastæði fyrir hreyfihamlaða því málningin fyllir upp í holur í malbiki og hellum og veldur því að yfirborðið verður of hált.
• Lóðrétt skilti skulu vera merkt bókstafnum P og merki hreyfihamlaðra. Gæta þarf þess að lóðrétt skilti séu ekki staðsett í gönguleiðum og athafnarýmum. Æskilegt er að þau séu fest á veggi bygginga þar sem því verður við komið, annars við jaðar gönguleiða og athafnarýma fjær götu/ bílastæði.

• Kantur frá til dæmis bílastæði að fláa á gönguleið má að hámarki vera 25 mm hár til að fólk í hjólastól geti farið um hann. Kanturinn er nauðsynlegur sjónskertu eða blindu fólki til að nema gönguleið frá annarri umferð. Æskilegt er að flái sé í öðrum lit en gönguleið og gata þannig að sjónskertir sem ekki nota hvítan staf geti betur greint hæðamismun og halla. Hámarks halli á fláanum er 1:10 (10 %). Ef hallinn er meiri er hætta á að hjólastóllinn velti.

• Í 11. mgr. 6.7.1 gr. segir: „Í nýbyggingum og við endurbyggingu skal gert ráð fyrir tengibúnaði vegna hleðslu rafbíla við hvert bílastæði.“
• Í öllum nýbyggingum skal vera gert ráð fyrir tengibúnaði vegna hleðslu rafbíla við hvert bílastæði í bílageymslu og hvert bílastæði utanhúss. Við endurbyggingu skal gert ráð fyrir tengibúnaði vegna hleðslu rafbíla við hvert bílastæði í bílageymslu og hvert bílastæði utanhúss. Með orðinu endurbygging er átt við í þessu tilfelli, þegar um ræðir eitthvað af eftirfarandi.
  • Endurnýjun á rafmagni sameignar
  • Endurnýjun á rafmagni í bílgeymslu
  • Endurnýjun á aðalrafmagnstöflu
  • Endurnýjun á bílgeymslu
  • Endurnýjun á bílastæðum á lóð
  • Breytt notkun mannvirkis í íbúðarhúsnæði

Þegar hleðslustöðvar eru settar niður við bílastæði hreyfihamlaðra skal aðgengi að þeim vera gott og hindrunarlaust.

Sjá leiðbeiningar um útfærslu á hleðslu rafbíla hér.

Yfirlit yfir breytingar sem gerðar hafa verið á leiðbeiningunni: